ኤጀንሲው በጃክ ማ የተበረከቱ የህክምና ቁሳቁሶች እያሰራጨ መሆኑን ገለፀ

በመጀመሪያ ዙር በእርዳታ የተሰጠውን የኮቪድ-19 መመርመሪያ ኪቶችና የህክምና መገልገያዎች እየተሰራጩ መሆኑን የኤጀንሲው መድኃኒትና የህክምና መገልገያ መሣሪያዎች የመጋዘንና የክምችት አስተዳደር ዳይሬክተር አቶ እንዳልካቸው መኮንን ገልጸዋል።

ቫይረሱ መኖር አለመኖሩን ለመለየት የሚያስችሉ 20 ሺህ 89 የመመርመሪያ ኪቶች፣ 47 ሺህ 950 N95 የፊት መሸፈኛ ጭምብል፣ 1 ሺህ 100 መከላከያ ሙሉ ፕላስቲክ ልብሶች፣ 52 ሺህ የፊት መሸፈኛ ጭምብል እና 1 ሺህ የፊት መከላከያ ፕላስቲክ በመሰራጨት ላይ ናቸው።

የህክምና ግብአቶቹ ስርጭት በኢትዮጵያ የህብረተሰብ ጤና ኢንስቲትዩት ጥያቄ መሰረት እየተካሄደ መሆኑም ታውቋል።

በጃክ ማ በሁለተኛ ዙር የተሰጠው ድጋፍም በኤጀንሲው መጋዘኖች ገብተው ለስርጭት ዝግጁ ሆነዋል ብለዋል ዳይሬክተሩ።

ኤጀንሲው ከዚህ ቀደም በቻይና መንግስት በእርዳታ የተሰጠውን የኮሮናቫይረስ ወረርሽኝ መከላከያ የሙቀት መጠን መለኪያ (ኢንፍራሬድ ቴርሞሜትር) ጨምሮ ሌሎች የህክምና ግብአቶችን ማሰራጨቱን አውስተዋል።

በጃክማ ፋውንዴሽን ለተደረገው የህክምና ቁሳቁስ ድጋፍም አቶ እንዳልካቸው ምስጋና ማቅረባቸውን ከኢትዮጵያ መድሐኒት አቅራቢ ኤጀንሲ ያገኘውን መረጃ ጠቅሶ ኢዜአ ዘግቧል።