ገፅታውን በመቀየር ሴት መስሎ በመቅረብ ከአንዲት ግለሰብ ላይ 103 ሺህ ብር አታሎ የወሰደው ተጠርጣሪ በቁጥጥር ስር ዋለ

የግል ተበዳይ የሆነችው እየሩሳሌም ሰሎሞን በጓደኛዋ አማካይነት ቺናን እንደተዋወቀችው እና ወደ ውጪ ሀገር ወስዶ ስራ እንደሚያስቀጥራት የነገራት መሆኑን በአራዳ ክፍለ ከተማ ፖሊስ መምሪያ የራስ ደስታ አካባቢ ፖሊስ ጣቢያ ወንጀል መርማሪ ዋና ሳጅን ታምሩ መሮ ገልፀዋል።

እስከዚያው በጋራ ሱፐር ማርኬት ከፍተው እየሰሩ እንዲቆዩ ጠይቋት እንደነበር ተናግረዋል፡፡

በተፈጠረው ቅርርብም ቺና ከአከራዩ ጋር እንዳልተስማማ እና ሌላ ማረፊያ ቤት እንደሚፈልግ ሲያማክራት እየሩሳሌምም በአራዳ ክፍለ ከተማ ወረዳ 4 በተለምዶ ዘበኛ ሰፈር ተብሎ በሚጠራው አካባቢ በሚገኝ ዩፍቲኒ ፔንሲዮን ይዛው መጥታ እዚያ እንዲያርፍ ማድረጓን መርማሪው አስረድተዋል ፡፡

በጋራ ሱፐር ማርኬት ለመክፈት የተነሳውን ሃሳብ በተመለከተም ቺና እየሩሳሌምን ብር እንድታመጣ ሲጠይቃት ከተለያዩ ሰዎች በብድር ያገኘችውን 103 ሺህ ብር ትሰጠዋለች፡፡
እሱም የቀረውን እኔ እጨምርበታለሁ ብሎ ይቀበላታል፡፡

ከዚያ በኋላ ሰልኩን ዘግቶ ከፔንሲዮኑን ለቆ የወጣው ግለሰቡ ግለሰቧ ጥቆማ በመስጠቷ ክትትል ሲደረግበት ቆይቶ ቦሌ ሩዋንዳ አካባቢ በቁጥጥር ስር መዋሉን ፓሊስ ገልጿል።

የሴት ገፅታ ተላብሶ የተያዘው ቺና በፖሊስ በተደረገው ማጣራት ወንድ ሆኖ ተገኝቷል፡፡