የአሜሪካ መንግስትና የዓለም ባንክ ኢትዮጵያ ላይ የሚያደርጉት ጫና ተገቢ አይደለም – ዶክተር አረጋዊ በርሄ

ዋና ዳይሬክተሩ ዶክተር አረጋዊ በርሄ “በግድቡ ዙሪያ የሚደረግ ጫና ለኢትዮጵያዊያን አንድነትና ጉልበት ይሆናል እንጂ የጎላ ተጽዕኖ አይኖረውም” ብለዋል።

ዶክተር አረጋዊ በርሄ የአሜሪካ መንግስት በዓለም ባንክ በኩል የሚያደርገው ጫና ኢ-ፍትሃዊና ዓለም አቀፍ መርሆዎችን የጣሰ መሆኑም ተናግረዋል።

“የዓለም ባንክ በዋናነት በዓለም ዙሪያ የአገሮችን ዕድገት የሚያረጋግጡ ልማቶችን የመደገፍ መርህ ይዞ የሚንቀሳቀስ ዓለም አቀፍ ድርጅት ቢሆንም ከግድቡ ጋር በተያያዘ ይህን መርህ በኢትዮጵያ ላይ አልተከተለም” ነው ያሉት።

ኢትዮጵያ ታላቁን የኢትዮጵያ ሕዳሴ ግድብ መገንባት ከጀመረችበት ጊዜ አንስቶ የአሜሪካ መንግስት ዓለም ባንክን በመጠቀም በተዘዋዋሪ በኢትዮጵያ ላይ ጫና ሲያደርግ እንደሚታይም ገልጸዋል።

በተለይም የአሜሪካ ፕሬዚዳንት ዶናልድ ትራምፕ ካደረጓቸው ንግግሮችና ጫናዎች አንዳንዶቹ የኢትዮጵያን ሉዓላዊነት የሚጋፉ እንደሆኑም ጠቁመዋል።

“አሜሪካ በመካከለኛው ምስራቅና በአፍሪካ ቀንድ አካባቢ ባላት የፖለቲካና የኢኮኖሚ ፍላጎት የተነሳ በግብጽና በኢትዮጵያ መካከል ገሃድ የወጣ አድሎ

እየፈፀመች ነው” እንደሆነ ነው ዋና ዳይሬክተሩ የተናገሩት።

አሜሪካና የአሜሪካ ህዝብ በኢትዮጵያ በተለያዩ ጊዜያት ችግሮች ሲገጥሙ ድጋፍ ሲያደርጉ መቆየታቸውን አስታውሰው፣ ከቅርብ ጊዜ ወዲህ ግን ከግድቡ ጋር በተያያዘ በኢትዮጵያ ላይ ጫና መደረጉ መታረም እንዳለበት አስገንዝበዋል።

“የግድቡ ግንባታ የተጀመረው የኢትዮጵያን ህዝብ በመተማመን እንጂ እነሱን በመተማመን አይደለም” ሲሉም ተናግረዋል።

ፕሬዚዳንት ትራምፕ በቅርቡ ከግድቡ ጋር በተያያዘ የተናገሩትን ንግግር ተከትሎ በኢትዮጵያ በግድቡ ዙሪያ ከፍተኛ የአንድነትና የተነሳሽነት ስሜት መፈጠሩንም ዶክተር አረጋዊ ጠቅሰዋል።