አዲስ ወግ የውይይት መድረክ ተካሄደ

በውይይቱ የመነሻ ጽሁፍ ያቀረቡት ከአዲስ አበባ ዩኒቨርሲቲ የህግ ትምህርት ክፍል ዶክተር መሰንበት አሰፋ የምርጫ ሂደቱ ሰላማዊ እንዲሆን ሰብዓዊ መብትን እና የህግ የበላይነትን ማክበር ከሁሉ በላይ ቅድሚያ ሊሰጠው ይገባል ብለዋል።

ምርጫው ዴሞክራሲ እና ነጻነት የሚረጋገጥበት ቢሆንም ሁለቱም ለሚፈልጉት ስርዓት ሁሉም አካል ራሱን ማስገዛት አለበትም ነው ያሉት።

በምርጫ ሂደት ማሸነፍም መሸነፍም እንደመኖሩ የበዛ ፖለቲካዊ ጉጉት ከእውነታ ጋር ሊታረቅ እንደሚገባም አስገንዝበዋል።

ለዚህም የፖለቲካ ፓርቲዎች እውነታውን ተገንዝበው ወደ ተሻለ የፖለቲካ ስርዓት ለመሸጋገር መስራት እንዳለባቸው አጽንኦት ሰጥተዋል ።

ሌላኛዋ የመነሻ ጽሑፍ አቅራቢ ህይወት አለማየሁ በበኩላቸው፥ በኢትዮጵያ የምርጫ ታሪክ አስቀድመው የተካሄዱ ምርጫዎች በቀጣዩ ላይ አሉታዊ ጫና እያሳደሩ ማለፋቸውን አውስተዋል።

በዚህ ምክንያት ቀጣዩ ምርጫ ያለፉት ምርጫዎች ባለ ዕዳ መሆኑን ጠቅሰው፥ ይህን ችግር ለማስተካከል ብሎም ቀጣዩ ምርጫ ሰላማዊ እና የተሳካ እንዲሆን ሁሉም አካላት የድርሻቸውን ሊወጡ እንደሚገባም አንስተዋል።

አያይዘውም ህዝቡ መብቱ እንዲከበርለት የሚፈልገውን ያህል ግዴታውን ሊወጣ እንደሚገባና የፖለቲካ ፓርቲዎችም ስለ ሰላም ለራሳቸው ደጋፊዎች ግንዛቤ መፍጠር እንደሚገባቸውም አስረድተዋል።

ከዚህ ባለፈም በተቋማት መካከል የተሟላ ቅንጅት መፍጠር ይገባልም ነው ያሉት ባቀረቡት የመነሻ ጽሁፍ፡፡

በዓላዛር ታደለ