“የእኛ ዝግጅት ለጁንታዉ ሳይሆን ለጋላቢዎቻቸዉ ነዉ ” ሌ/ ጀ ባጫ ደበሌ

የኢፌዴሪ መከላከያ ሰራዊት የሰራዊት ግንባታ ስራዎች ዋና አስተባባሪ ሌ/ጀነራል ባጫ ዛሬ በቡልቡላ ማሰልጠኛ ማዕከል ተገኝተዉ ለተመራቂዎች መልእክት አስተላልፈዋለ።

በዚሁ ጊዜ እንደተናገሩት ሀገራችን ኢትዮጲያን ፈተና ሲያጋጥማት የመጀመሪያዋ አይደለም ያሉት ጀኔራል ባጫ ያሁኑን ፈተና ለየት የሚያደርገዉ በሀገር ሀብት ሰልጥነዉ፣ በሀገር ሀብት ኖረዉ የራሳቸዉን ጦር ለመዉጋት የመጀመሪያዎቹ የውስጥ ጠላት መሆናቸው ነዉ ብለዋል።

ጀነራል መኮንኑ አያይዘዉም በ1888 ዓ.ም በዓድዋ ጦርነት ወቅት ለፋሽስቱ ሃይል ይሰሩ የነበሩ ባንዳዎች እንደነበሩ አንስተዉ፥ በወቅቱ የነበሩት ጀግኖች ወጣቶችና ታማኝ ኢትዮጵየውያን በከፈሉት መስዋዕትነት ወራሪዉ የጣሊያ ጦርና ጀሌዎቹ ድባቅ መመታታቸውን አስረድተዋል።

ሌተናል ጀነራል ባጫ ቀጥለውም በ1928 በኢጣሊያ ፋሽስቶች ዳግመኛ ወረራ ሲካሄድብን እጅግ በርካታ የሀገር ተወላጅ ባንዳዎች ቢኖሩም በብዙሀኑ የኢትዮጵያ ህዝብ የተባበረ ክንድ ዋጋቸዉን ቀምሰዋል ተሸንፈዋል ብለዋል።

ጅኔራል ባጫ እንዳሉት በ1969ዓ.ም የዚያድ ባሬ መንግስት በኢትዮጵያ ላይ ወረራ ባካሄደበት ወቅት የዛሬዉ ጁንታ ህወሃት ኢትዮጲያና ህዝቦቿን መጠበቅ ሲገባዉ ከሶማሊያ ጦር ጎን ተሰልፎ ነበር።

ነገር ግን ከ300 ሺህ በላይ ምልምል ወጣቶች በአጭር ጊዜ ውስጥ ስልጠና ወስደው በሜካናይዝድና በዘመናዊ መሳሪያ የተደራጀዉን ወራሪዉን ጦር ከነ ባንዳዉ ማክሸፋቸዉ ታሪክ የማይረሳዉ ድል ነዉ ብለዋል።

የዛሬ ተመራቂዎችም የዚህ ተዉልድ የመከላከያ ጋሻዎች በመሆናችሁ ጥሪ ሲደረግላችሁ እናት አባቴ ሳትሉ ለሀገራችሁ በመቆማችሁ ክብርና ሞገስ ይገባችኋል ብለዋል።

“ዛሬ የገጠሙን ጠላቶች ድሮም ከዚያድ ባሬ ጋር የወገኑት ጁንታዎች ናቸዉ። የእኛ ዝግጅት ለጁንታዉ አይደለም፤ ጁንታዉ ቀድሞዉንም ተሸንፏል፤ ዝግጅታችን ለገላቢዎቻቸዉ ነዉ” ብለዋል።

በአንድ ድንጋይ የወረደ ጁንታ ጠመንጃ ታጥቄያለሁ ብሎ ስልጣን ሊይዝ አይችልም ያሉት ጀኔራል ባጫ፥ “ እነሱ ኢትዮጵያን ለማፈራረስ ከሰይጣንም ጋር እንሰራለን ብለዋል፤ ነገር ግን ኢትዮጵያን ሊያፈሱ አይችሉም፣ ምክኒያቱም እነሱ የሚዋጉት ከ110 ሚሊየን ህዝብ ጋር ነዉና” ሲሉ ተናግረዋል ።

በብስራት መንግስቱ

ወቅታዊ፣ትኩስ እና የተሟሉ መረጃዎችን ለማግኘት፡-

ድረ ገጽ፦ https://www.fanabc.com/

ፌስቡክ፡- https://www.facebook.com/fanabroadcasting

ዩትዩብ፦ https://www.youtube.com/c/fanabroadcastingcorporate/

ቴሌግራም፦ https://t.me/fanatelevision

ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን!