ደም መለገስ ለእኛ ትንሹ ግዴታ ነው – የጎንደር ፋና ኤፍ ኤም ሰራተኞች

የጣቢያው ስራ አስኪያጅ አቶ ነብዩ ዮሐንስ ፥ለኢትዮጵያ ክብር፣ ነፃነት፣ ሰላምና የግዛት አንድነት መጠበቅ ያለንን ሁሉ ለመስጠት ዝግጁ ነን ብለዋል።

ሁሉም ኢትዮጵያዊ በሚችለው ሁሉ የኢትዮጵያን የውስጥና የውጭ ጠላቶች ለመመከትና ለማሸነፍ መሰለፍ አለበት ነው ያሉት።

በገንዘብና በቁሳቁስ ከሚደረገው የደጀንነት ሚና በተጨማሪ ህይወቱን እየሰጠ ላለው የወገን ጦር የደም ልገሳ በማድረግም ሀላፊነትን መወጣት ያስፈልጋል ብለዋል።

የደም ልገሳ ያደረጉት የተቋሙ ጋዜጠኞች፣ የአስተዳዳር ሰራተኞችና ተባባሪ አዘጋጆች ደም መለገስ ለሰጪው የአእምሮ ሰላም ለተለጋሾች ደግሞ ህይወትን የሚሰጥ በመሆኑ ድጋፋችን ይቀጥላል ብለዋል።

ከደም ልገሳው በተጨማሪ ዜጎች ለህልውናቸውና ለሀገራቸው ክብር ሲሉ የመከላከያ ሰራዊትን በመቀላቀል ሀገራዊ ግዴታን ሊወጡ ይገባል ብለዋል።

በዚህ ወቅት ተገኝተው ምስጋና ያቀረቡት የጎንደር ደም ባንክ ሀላፊው አቶ ደመቀ ጥላሁን በበኩላቸው÷ ዜጎች እያበረከቱት ያለው አስተዋፅኦ የሚበረታታ ነው ብለዋል።

ባለፉት ሁለት ወራት ጊዜ ውስጥ 3 ሺህ 600 ያህል ዩኒት ደም በመሰብሰብ ዘማቾች ለሚታከሙባቸው የህክምና ተቋማት እያሰራጩ መሆናቸውን ገልፀዋል።

በሙሉጌታ ደሴ