ጀርመን ከ271 ሺህ ዶዝ በላይ የኮቪድ-19 ክትባት ለኢትዮጵያ ድጋፍ አደረገች

ዶክተር ሊያ በአገር አቀፍ ደረጃ የኮቪድ-19 ወረርሽኝ ስርጭትን ለመግታት ክትባት በስፋት እየተሰጠ መሆኑን ተናግረዋል፡፡

ዓለም አቀፍ ድርጅቶች ከሚያደርጉት ድጋፍ በተጨማሪ በመንግስት ወጪ ክትባቱ እየተገዛ መሆኑን ገልፀው በዚህም በአገር አቀፍ ደረጃ 2 ነጥብ 4 ሚሊዮን ሰዎች መከተባቸውን ተናግረዋል፡፡

የጀርመን መንግስት ያበረከተው አስትራዜኒካ ክትባቱን በስፋት ለመስጠት የሚያስችል እንደሆነ የገለፁት ዶክተር ሊያ የመጀመሪያውን ክትባት ለወሰዱ ሰዎች ሁለተኛ ዙር መስጠት እንደሚያስችል ተናግረዋል፡፡

ክትባቶቹ ለዓለም አቀፉ ማህበረሰብ እየተሰጡ መሆናቸውን የገለጹት ዶክተር ሊያ ዜጎች ያለምንም ስጋት እንዲከተቡ አሳስበዋል፡፡

ከዓለም አቀፍ ድርጅቶች 3 ሚሊዮን ዶዝ የሚጠጋ አስትራዜኒካ፣ ጆንሰን እና ጆንሰን እንዲሁም ሳይኖፋርም የኮቪድ ክትባቶች በድጋፍ መገኘታቸውን ገልፀዋል፡፡

ድጋፉ ከአፍርካ ኅብረት፣ ከዓለም የጤና ድርጅት፣ ከዩኒሴፍና ኮቫክስ መገኘቱን የገለፁት ሚኒስትሯ ተቋማቱ ድጋፋቸውን እንዲቀጥሉ ጠይቀዋል፡፡

በኢትዮጵያ የጀርመን ምክትል አምባሳደር ሃይኮ ኒች የክትባት ድጋፉ አገራቸው የቫይረሱን ስርጭት በጋራ ለመከላከል የምታደርገው ጥረት አካል መሆኑን መናገራቸውን ኢዜአ ዘግቧል፡፡