Muftiga guud ee arrimaha islaamka Itoobiya oo ka jawaabay hadal kasoo yeedhay sheekh Al-Azhar-ka Masar

Addis Ababa,June 18, 2021 (Senee 11,2013 T.I (FBC/SOMALI)-Madaxa Golaha Sare ee Arrimaha Islaamka Itoobiya, Mufti Xaaji Cumar Idriis ayaa cambaareeyay hadalkii ka soo yeedhay Sheekh Axmed Al-Tayeb, Sheekh Al-Azhar Al-Shariif ee Masar ee kuna saabsanaa biyo-xidheenka weyn ee Itoobiya (GERD).

Muftiga guud wuxuu sheegay in biyaha wabiga Nile ay ka soo burqadaan xudunta Itoobiya, isagoo xusay in Itoobiya ay xaq u leedahay inay ka faa’iideysato kheyraadkeeda dabiiciga ah iyada oo aan wax dhibaato ah u geysanin dalalka ay maraan biyaha wabiga Niil-ku.

Hadalkan ayaa ka dambeeyay bayaan ay Goluhu shalay warbaahinta u mariyeen si ay u beeniyaan hadalkii kasoo yeedhay Sheikh Al-Azhar-ka Masar ee ku saabsanaa biyo-xidheenka (GERD) maadaama bayaanka aanu tixgelin siinin xuquuqda dadweynaha Itoobiya.

Madaxa Golaha Sare ee arrimaha islaamku wuxuu carabka ku adkeeyay in Itoobiya aanay ka hor istaagin Masar iyo Suudaan inay ka faa’iideystaan ​​biyaha wabiga Niil-ka.Taabadalkeed, ayuu yidhi, waxa muhiim ah in looga faa’iideysto webiga si sinnaan leh, tanina waa caddaalad saafi ah.

Muftiga guud ayaa yidhi, Sheekha Al-Azhar waa inuu fiiriyaa runta oo ka feejignaadaa xalka Itoobiyaanka ee faqriga looga takhaluso isla markaana uu u istaago go’aannada wanaagsan ee dowladda Itoobiya ee arrintan la xidhiidha.

Mana aha inaynu qaladno, ayuu yidhi Muftiga, “Ilaah wuu caawiyaa dadka xaqa ku taagan markasta iyo meel kasta.”