በኮሎምቢያ ሄሊኮፕተር ተከስክሶ የ9 ሰዎች ህይወት አለፈ

አዲስ አበባ፣ ሚያዝያ 22፣ 2016 (ኤፍ ቢ ሲ) በሰሜናዊ ኮሎምቢያ ገጠራማ ስፍራ ላይ በተከሰተ የሄሊኮፕተር መከስከስ አደጋ የ9 ሰዎች ህይወት ማለፉ ተገለፀ፡፡

የኮሎምቢያ ጦር ባወጣው መግለጫ እንዳስታወቀው÷ ሄሎኮፕተሯ በሰሜናዊ ኮሎምቢያ የሽምቅ ተዋጊዎችን እና የአደንዛዥ እፅ አዘዋዋሪዎችን በሚከላከለው የሳንታ ሮዛ ዴል ሱር ወታደራዊ ቤዝ እቃዎችን እና ወታደሮችን እያዘዋወረች ነበር።

ኤምአይ 17 የተባለችው ሩሲያ ሰራሽ ሄሊኮፕተር በአከባቢው ሰዓት አቆጣጠር ቀን 1 ሰዓት ከ50 ላይ በድንገት መከሰከሷን መግለጫው ጠቁሟል።

የኮሎምቢያ ፕሬዚዳንት ጉሳታቮ ፔትሮ ÷ አውሮፕላኗ “ገልፍ ክላን” በመባል በሚታወቀው የአደንዛዥ ዕፅ አዘዋዋሪ ቡድን ላይ ለሚደረገው ዘመቻ ወታደሮችን እየወሰደች በነበረበት ወቅት መከስከሷን ገልፀው፤ በአደጋው የሰው ህይወት በመጥፋቱ የተሰማቸውን ሀዘን ገልፀዋል፡፡