የአውሮፓ ህብረት ለኢትዮጵያ ዲጂታል ኢኮኖሚ ግንባታ ስኬት የሚያደርገውን ድጋፍ አጠናክሮ እንደሚቀጥል ገለጸ

የአውሮፓ ህብረት ትብብር የኢትዮጵያ ኃላፊ ስቴፋን ሎክ ከኢኖቬሽንና ቴክኖሎጂ ሚኒስትር ዶክተር በለጠ ሞላ ጋር ተወያይተዋል።

በውይይታቸውም የአውሮፓ ህብረት የኢትዮጵያን የዲጂታል ኢኮኖሚ ግንባታ ጉዞ እንዲሳካ ሲያደርግ የነበረውን ድጋፍ አጠናክሮ እንደሚቀጥል ስቴፋን ሎክ አረጋግጠዋል።

ዶክተር በለጠ ሞላ በበኩላቸው÷የአውሮፓ ህብረት ለኢትዮጵያ የዲጂታል ኢኮኖሚ ግንባታ ስኬት እያደረገ ስላለው ድጋፍ ምስጋና አቅርበዋል።

የአውሮፓ ህብረት በሳይንስ፣ ቴክኖሎጂ እና ኢኖቬሽን ዘርፍ በቴክኒክና በገንዘብ ድጋፍ እያደረገ መሆኑን የኢኖቬሽንና ቴክኖሎጂ ሚኒስቴር መረጃ ያመላክታል፡፡