Lagni Awaash guutuun jiraattoonni kumni 32 ol qa’ee fi qabeenya isaaniirraa buqqa’an
Finfinnee, Adoolessa 29, 2012 (FBC) – Naannoo Afaaritti lagni Awaash guutuun jiraattoonni kumni 32 ol qa’ee fi qabeenya isaaniirraa buqqa’uu Biiroon Ittisa Balaa fi Wabii Nyaataa naannichaa beeksise.
Lagni Awaash hammaa ol guutuun jiraattoonni aanaalee 6 qa’ee fi qabeenya isaaniirraa buqqa’uu daayreektarri akeekkachiisaa duraa fi deebii hatattamaa naannoo Afaar obbo Aydaahiis Yaasiin ibsaniiru.
Akka ibsa daayreekterichaatti naannichatti aanaaleen naannoo laga Awaash jiran 7 balaaf saaxilamoodha.
Rakkoo kana furuuf Abbaan Taayitaa Yaa’a Laga Awaash qaamoolee federaalaa fi naannoo waliin qindoominaan lolaa ittisuuf hojjetus ganni bara kanaa cimaa ta’uu isaan aanaaleen 6 balaa lolaaf saaxilamuu himaniiru.
Aanaalee kanneeniitti qabeenyarra miidhaa guddaan qaqqabuu obbo Aydaahiis ibsaniiru.
Jiraattoota aanaa Aysaa’iitaa gandoota lama keessa jiraataniif mootummaan federaalaa Heeliikooptaraan namoota kuma 1 fi 100 miidhaan nyaataa dhiyeessaa jiraachuu ibsameera.
Namoonni kumni 17 fi 450 ol aanaa Aysaa’iitaa gandoota 5 keessaa kan buqqa’aniidha.
Dilbata darbee eegalee namoonni kumni 1 fi 126 bishaaniin marfamanii jiraachuu himameera.
Naannoo Afaar yaa’a gara gadii Awaashitti namoonni kumni 63 balaa lolaaf saaxilamoo yoo ta’an, namoonni kumni 44 qa’ee fi qabeenya isaanirraa buqqa’u danda’u jedhame.
Maddi:-TOI