ለሥራ ፈላጊው ወጣት ሥራ ለመፍጠር ሚኒስቴሩ ከተለያዩ አደረጃጀቶች ጋር መክሮ የመፍትሄ አቅጣጫ ያስቀምጣል – አቶ ንጉሡ ጥላሁን

በመጀመሪያው ዙር ከሰባት ክልሎች ተወክለው የመጡ የጣቢያዎቹ አስተባባሪዎች እና ኃላፊዎች በፀጥታ ችግር ምክንያት ጣቢያዎቹ ላይ የሚደርስ ጉዳት፣ የቁሳቁስ አለመሟላት፣ የስልጠናዎች አለመመቻቸት፣ የሠራተኞች ፍልሰት፣ ለዘርፉ የሚሰጠው ትኩረት ማነስ እና የመሳሰሉት ችግሮች ተነስተዋል።

ውይይቱን የመሩት በሥራ እና ክህሎት ሚኒስቴር የሥራ፣ ሥራ ስምሪት እና ገበያ ዘርፍ ሚኒስትር ዴኤታ አቶ ንጉሡ ጥላሁን፥ መድረኩ ለሥራ ፈላጊው ወጣት ሥራ ለመፍጠር የሚሰሩት ጣቢያዎች ያሉባቸውን ችግሮች ለመረዳት ሰፊ ዕድል ሰጥቷል ብለዋል።

ይህንንም ለመፍታት በሚኒስቴር መስሪያ ቤቱ እና በጣቢያዎቹ መካከል ካሉት የክልል፣ የዞን እና የወረዳ አደረጃጀቶች ጋር ተመካክሮ የመፍተሔ አቅጣጫ የማስቀመጥ ድርሻውን ሚኒስቴር መስሪያ ቤቱ እንደሚወጣ ተናግረዋል።

በሥራ እና ክህሎት ሚኒስቴር አማካሪ ሚኒስትር ዴኤታ ነቢሃ መሀመድ በበኩላቸው ፥ የአንድ ማዕከላት ጣቢያ አስተባባሪዎቹ ወጣቱን ከሥራ ጋር የሚያገናኙ እንደመሆናቸው የተነሱት ጥያቄዎች ግልፅ እና ለመፍትሔ የሚመቹ በመሆናቸው በአጭር እና ረጅም ጊዜ ከፋፍለን ምላሽ የሚያገኙበትን አቅጣጫ እንከተላለን ነው ያሉት፡፡

አክለውም ፥ አስተባባሪዎቹ የወጣቱ ፍላጎት ከፍተኛ መሆኑን በመገንዘብ ችግሮቹን ላይ ብቻ ከማትኮር ይልቅ ጠንክረው እንዲሰሩ አሳስበዋል።

ለሁለት ቀናት የተካሄደው የመጀመሪያው መድረክ ሲጠናቀቅ፥ የሌሎች የክልል እና ከተማ አስተዳደሮች የአንድ ማዕከል አገልግሎት መስጫ ጣቢያ አስተባባሪና ኃላፊዎችን በማሳተፍ በቀጣይ እንደሚካሄድ ከሚኒስቴሩ ያገኘነው መረጃ ያመለክታል።

ወቅታዊ፣ትኩስ እና የተሟሉ መረጃዎችን ለማግኘት፡-

ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡

ዘወትር፦ ከእኛ ጋር ስላሉ እናመሰግናለን፡፡