ቀነኒሳን ኪፕቾጌን ኣብ ለንደን ማራቶን ዝገብሩዎ ንሕንሕ ዓለም ብሃንቀውታ ይፅበዮ ኣሎ

ወዲ 37 ዓመት ቀነኒሳ በቀለ ኣብ ዝሓለፈ ወርሒ መስከረም ኣብ ከተማ በርሊን ኣብ ዝተዓወተሉ እዋን፥ ብኪፕቾጌ ተታሒዙ ዝርከብ ክብረ ወሰን ማራቶን ዓለም ንምስባር 2 ሰከንድታት ጥራሕ ቀርየንኦ ከምዝነበራ ይዝከር።

ኣትሌት ቀነኒሳ፥“ቅድሚ ሕዚ ምስ ኤልዩድ ኪፕቾጌ ብዙሓት ውድድራት ገይርና ኢና፤ ኣብ ቀፃሊ እውን ክንወዳደር ኢና ኢለ የሓስብ” ክብል ዘለዎ ትፅቢት ንቢቢሲ ገሊፁ።

ዳይሬክተር ማራቶን ለንደን ሁፍ ብሬሸር፥ ዓለም ቅድድም ሓያላት ኣትሌታት ንምርኣይ ብሃንቀውታ ትፅበ ኣላ ኢሎም።

ከም ኣቆፃፅራ ኣውሮፓውያን 26 ሚያዝያ 2020 ዝካየድ ውድድር ለንደን ማራቶን፥ ኢትዮጵያውያን ኣትሌታት ሞስነት ገረመውን ሙሌ ዋሲሁንን እውን ተሳተፍቲ ክኾኑ ኢዮም ዝብል ትፅቢት ኣሎ።

ወዲ 35 ዓመት ኤልዩድ ኪፕቾጌ ኣብ ወርሒ ጥቅምቲ ኣብ ቬና ዝተሳለጠ ውድድር ማራቶን፥ ትሕቲ ክልተ ሰዓት ናይ ምእታው ታሪኻዊ ጉያ ፈተነ ክብረ ወሰን ክወስድ ምኽኣሉ ይፍለጥ።

ኣብቲ ውድድር ነቲ ቅድድም ጉያ ማራቶን 1 ሰዓት 59 ደቒቓን 40 ሰከንድን ብምዝዛም ታሪኽ ክሰርሕ ክኢሉ ኢዩ።

ኪፕቾጌ ከም ኣቆፃፅራ ኣውሮፓውያን ካብ 2013 ንደሓር 12 ውድድራት ማራቶን ኣካይዱ ኣብቶም 11 ዓወት ከመዝግብ ክኢሉ ኢዩ።