ጉጅለ ኢንቨስትመንት ዩናይትድ ቻይና ኣብ ኣዲስ ኣበባ መንደር ኢንዱስትሪ ናይ ምህናፅ ድሌት ከምዘለዎ ገሊፁ

ዶክተር ኣክሊሉ ኣብቲ እዋን ዘተ ኣብ ኢትዮጵያ ዓበይቲን ንክልቲአን ሃገራት ተረባሕቲ ዝገበሩ ዕዉታት ስራሕቲ ኢንቨስትመንት ከምዘለዉ ብምሕባር፥ ጉጅለ ኢንቨስትመንት ዩናይትድ ቻይና ኣብ ኢትዮጵያ መንደር ኢንዱስትሪ ንምህናፅ ዘርኣዮ ድሌት ኣድኒቖም።

እቲ ኩባኒያ ኣብ ኢትዮጵያ ተሊሙዎ ዘሎ ስራሕቲ ኢንቨስትመንት ንምዕዋት መንግስቲ ኢትዮጵያ ኣድላዪ ዘበለ ሓገዝ ንምግባር ቁርፀኛ ከምዝኾነ ኣረጋጊፆም።

ፕሬዚዳንት እቲ ጉጅለ ኢንቨስትመንት ሰሂቼንግ ዣንግ ብግደኦም፥ ኣብ ኣዲስ ኣበባ ብዙሓት ዘፈራት ዘሓዘ መንደር ኢንዱስትሪ ንምህናፅ ድሌት ከምዘለዎ ገሊፆም።

እቲ ንምህናፅ ዝተሓሰበ መንደር፥ ማእኸላት መፍረዪ ኤሌክትሮኒክስን መማዕበሊ ሶፍትዌርን ሓዊሱ ዝተፈላለዩ ሆቴላትን ኣፓርትመንታትን ኣብ ውሽጡ ከምዝሓዘ እቶም ፕሬዚዳንት ኣብሪሆም።